News

အရေးပေါ် သတိပေးချက် ၀န်ဆောင်မှု Twitter စတင်

လူမှုကွန်ရက် Website တစ်ခုဖြစ်သည့် Twitterသည် အစိုးရ အဖွဲ့အစည်းများနှင့် အစိုးရမဟုတ်သော NGO အဖွဲ့အစည်းများသို့ သဘာ၀ဘေး သို့မဟုတ် အရေးပေါ် အခြေအနေ သတိပေးချက်များကို ဖုန်းများဆီသို့ တိုက်ရိုက်သတင်းပေးပို့သည့် ၀န်ဆောင်မှုကို စတင်ပြီဖြစ်ကြောင်း ထုတ်ပြန်ကြေညာသည်။ အသုံးပြုလိုသူများသည် Twitters Alertsတွင် ၀င်၍ Sign Up လုပ်ရန်လိုပြီး Twitterက လက်ခံလျှင် Alert ဆိုသည့် အမှတ်အသားပေါ်လာမည် ဖြစ်သည်ဟု သိရသည်။

Twitter အနေဖြင့် ယုံကြည်စိတ်ချရသည့် အဖွဲ့အစည်းများထဲမှရသော သဘာ၀ဘေးအန္တရာယ် သတိပေးချက်များ၊ အရေးပေါ်အခြေအနေများကို အချိန်နှင့် တပြေးညီ ထုတ်ပြန်ပေးသွားမည် ဖြစ်ပြီး Sign Up လုပ်ထားသည့်သူတိုင်း၏ ဖုန်းများဆီသို့ သတင်းများကို မပြတ်ပို့ပေးနေမည်ဟု ကုမ္ပဏီ ၀န်ဆောင်မှုဌာနက ဆိုသည်။ ဤအစီအစဉ်သစ်အတွက် ဆက်သွယ်လာသော အဖွဲ့အစည်းဌာနပေါင်း ၆၀ကျော်ရှိပြီဖြစ်ကာ လူ၀ီစီယားနား၊ ဖလော်ရီဒါ၊ နယူးယောက်နှင့် ကော်လိုရာဒို အရေးပေါ် စီမံခန့်ခွဲရေးဌာနများက Sign Up လာလုပ်သွားပြီ ဖြစ်ကြောင်း၊ ထို့အပြင် အမေရိကန် ကြက်ခြေနီအဖွဲ့၊ ကုလသမဂ္ဂ WHO အဖွဲ့နှင့် တိုကျိုမက်ထရိုပိုလီတန် ရဲတပ်ဖွဲ့တို့ကလည်း Sign Up လုပ်ထားကြောင်း၊ Twitterက ထုတ်ပြန်ကြေညာခဲ့သည်။

အမေရိကန်ပြည်ထောင်စုတွင် ဘော့စ်ထွန်မာရသွန်ပွဲ ဗုံးပေါက်ခွဲမှုနှင့် ဆင်ဒီမုန်တိုင်း သဘာ၀ဘေးဒဏ်များ ခံရပြီးချိန်က စတင်ကာ Twitter အနေနှင့် အစိုးရအဖွဲ့အစည်းများနှင့် ပြည်သူများသို့ သတိပေးချက်များ အချိန်မီ ထုတ်ပြန်ရန်လိုအပ်သောကြောင့် ယခု၀န်ဆောင်မှုကို လုပ်ဆောင်ရခြင်းဖြစ်ကြောင်း ပြောကြားသည်ဟု သိရသည်။

author-avatar

About TZO

အမည်ရင်း ဦးသန်းဌေး ဖြစ်ပြီး Myanmar ICT Newsတွင် စီနီယာ အယ်ဒီတာအဖြစ် ဆောင်ရွက်နေသူ ဖြစ်သည်။ ၁၉၇၂ခုနှစ်တွင် မြန်မာစာ အဓိကဖြင့် ပုသိမ် ဒီကရီကောလိပ်မှ ဘွဲ့ရရှိခဲ့ပြီး ၁၉၈၀ခုနှစ်တွင် အထက်တန်း ရှေ့နေ စာမေးပွဲကို အောင်မြင်ခဲ့သူလည်း ဖြစ်သည်။ ၁၉၇၃ခုနှစ်မှ ၂၀၁၁ခုနှစ်အတွင်း နိုင်ငံတော် ကောင်စီရုံး၊ ပြည်ထဲရေး ၀န်ကြီးဌာနတို့တွင် တာ၀န်ထမ်းဆောင်ခဲ့ပြီး ဦးစီးအရာရှိ အဖြစ်မှ အငြိမ်းစား ယူခဲ့သည်။ ကိုဘအေး ဆောင်းပါးများဖြင့် စာပေးလောကသို့ ၀င်ရောက်ခဲ့ပြီး Myanmar ICT Newsတွင် ပြည်တွင်း၊ ပြည်ပ သတင်းများ ရေးသားလျက်ရှိပါသည်။

Related Posts

Leave a Reply

Your email address will not be published. Required fields are marked *