ပြည်တွင်းရှိဆော့ဖ်ဝဲ Industry ဖွံ့ဖြိုးတိုးတက်စေရန်အတွက် မြန်မာနိုင်ငံ ကွန်ပျူတာအသင်းချုပ်မှ ဦးစီး၍ SIDC (Software Industry Development Committee) အားဖွဲ့စည်းဆောင်ရွက်နေပြီဖြစ်ကြောင်း သိရသည်။
SIDC အား ယခုနှစ် နှစ်ဆန်းပိုင်း၌ စတင်ဖွဲ့စည်းခဲ့ခြင်းဖြစ်ပြီး ဆော့ဖ်ဝဲထုတ်လုပ်သည့် လုပ်ငန်းရှင်များ၊ ရေးဆွဲသူများအကြား အချင်းချင်းချိတ်ဆက်နိုင်ရန် SIDC ၏ ဝက်ဘ်ဆိုက်အား မကြာမီထုတ်လွှင့်မည်ဟုဆိုသည်။
“မြန်မာနိုင်ငံမှာ Software Industry မှ ဖွံ့ဖြိုးတိုးတက်ဖို့အတွက် ဒီကော်မတီကို ဖွံ့စည်းခဲ့တာပါ။ အခုကော်မတီဖွဲ့တာက ဆော့ဖ်ဝဲရေးတဲ့သူအားလုံးကို စုစည်းလိုက်တဲ့သဘောပါ။ ဆော့ဖ်ဝဲရေးချင်တဲ့သူတွေအတွက်လည်း ဆော့ဖ်ဝဲရေးပုံရေးနည်းတွေ၊ လုပ်ငန်းတည်ထောင်ဖို့ ရွေးပုံရွေးနည်းတွေကို အကြံပြုပေးသွားမှာပါ။ ပြည်ပကဆော့ဖ်ဝဲရေးသူတွေနဲ့လည်း ချိတ်ဆက်ပေးသွားမှာပါ” ဟု SIDC ၏အတွင်းရေးမှူး ဦးအောင်မောင်းက ပြောကြားသည်။
ပြည်တွင်း၌ ကဏ္ဍပေါင်းစုံဖြစ်သည့် e-government ကဏ္ဍ၊ ကျန်းမာရေး ကဏ္ဍ၊ ဆက်သွယ်ရေး ကဏ္ဍ၊ အုပ်ချုပ်ရေး ကဏ္ဍ၊ စီးပွားရေးစသည်ဖြင့် နေရာစုံ၌ အသုံးပြုရန် ဆော့ဖ်ဝဲလိုအပ်ချက် များစွာရှိသော်လည်း ပြည်တွင်းရှိ Software Industry မှာ လိုအပ်ချက်များစွာရှိသေးကြောင်း သိရသည်။
