Mobile စနစ်ဖြင့် မိသားစုဝင်များ သွားလာလှုပ်ရှားမှုများကို အချိန်မရွေး သိရှိနိုင်သော Gothere Myanmar Family Locator Mobile Application ကို စတင် အသုံးပြုနိုင်ပြီ ဖြစ်ကြောင်း သိရှိရသည်။ ၄င်း Appsသည် လူအများ သိရှိပြီး ဖြစ်သော GPS အခြေခံ စနစ်မျိုး မဟုတ်ပဲ GPS မရှိသော (သို့မဟုတ်) မမိသော Android Handset များနှင့် Tablets များတွင် ထည့်သွင်း အသုံးပြုနိုင်သည်ဟု ဆိုသည်။
Family Locatorစနစ် ထည့်သွင်းထားသည့် ဖုန်းများတွင် အင်တာနက်ဝန်ဆောင်မှုရှိရန် လိုအပ်သော်လည်း အမြဲဖွင့်ထားရန် မလိုအပ်ပေ။ ၄င်း Applicationမှ လိုအပ်သော အချိန်တွင် အလိုအလျောက် ဖွင့်ပေးမည် ဖြစ်သည်။ Mobile Deviceများ၏ ရွေ့လျားမှုကို အခြေခံထားသောကြောင့် အင်တာနက် အသုံးပြုမှုမှာ တစ်ရက်လျှင် မိနစ်ခြောက်ဆယ်ထက် ပိုမသုံးရပေ။ ထို့အပြင် ဖုန်းပျောက်ချိန်တွင် အလွယ်တကူ ရှာပေးနိုင်မည် ဖြစ်ပြီး ဖုန်းပါဝါပိတ်နေချိန်တွင် ပါဝါမပိတ်မှီ နောက်ဆုံး အချိန်အထိ တည်နေရာကို ဖော်ပြပေးနိုင်သည်။
သံလိုက်အိမ်မြှောင်စနစ်ဖြင့် မိသားစုဝင်များ တည်ရှိနေသော အရပ်မျက်နှာနှင့် အကွာအဝေးကိုပါ ဖော်ပြပေးနိုင်ပြီး တည်နေရာကို ပြန်လည်ကြည့်ရူရာတွင် Gothere Myanmar Map, Google Map, Google Satellite Map တို့ကို အသုံးပြုနိုင်သည်။ ၄င်းစနစ်ကို အသုံးပြု လိုပါက Android Version 2.3 အနည်းဆုံး ရှိရမည်ဟု ဆိုသည်။ ထို့အပြင် Gothere Myanmar တစ်နှစ်စာ ၂၀၀၀ ကျပ်တန် Giftcard ထည့်သွင်းရမည်။
ယခင်က ထည့်သွင်းထားသူများသည် နောက်တစ်ကဒ် ထပ်ဖြည့်ရန် မလိုပေ။ Family Locator အတွက် တစ်နှစ်စာ ၂၀၀၀ကျပ်သည် အချိန်ကာလ ကန့်သတ်ချက်ရှိပြီး Promotion ကာလကျော်လွန်ပါက ဈေးနှုန်း အပြောင်းအလဲ ရှိသည်ဟု ဆိုသည်။ Gothere Giftcard များကို နီးစပ်ရာ ဖုန်းဆိုင်များတွင် ဝယ်ယူရရှိနိုင်ကြောင်း သိရှိရပါသည်။
