ကင်တားနားအား မြန်မာ့လူ့အခွင့်အရေး ကိုယ်စားလှယ်တာ၀န်မှ ရပ်နား

ကုလသမဂ္ဂ၏ မြန်မာနိုင်ငံ လူ့အခွင့်အရေးဆိုင်ရာ အစီရင်ခံစာ တင်သွင်းသူ ကင်တားနားအား ရာထူးသက်တမ်းကို ထပ်မံတိုးပေးတော့မည်မဟုတ်ပဲ ရပ်ဆိုင်းတော့မည်ဖြစ်ကြောင်း သိရသည်။ စက်တင်ဘာ ၂၄ရက်က ပြုလုပ်ခဲ့သော ကုလသမဂ္ဂ လူ့အခွင့်အရေးဆိုင်ရာ အစည်းအဝေးတစ်ခုတွင် ယင်းသို့ ဆုံးဖြတ်ခဲ့ခြင်း ဖြစ်သည်။

“သူ့ကို ကုလသမဂ္ဂရဲ့ မြန်မာနိုင်ငံ လူ့အခွင့်အရေးဆိုင်ရာ အစီရင်ခံစာ တင်သွင်းသူအဖြစ် တာ၀န်သက်တမ်းကို ထပ်မံတိုးမပေးတော့တာလို့ သိရပါတယ်။ သူ့နေရာမှာ အသစ်တစ်ဦး ခန့်ထားရမှာ ဖြစ်ပါတယ်”ဟု နိုင်ငံတော် သမ္မတရုံးမှ တာ၀န်ရှိသူတစ်ဦးက အတည်ပြု ပြောကြားခဲ့သည်။ အမျိုးသား ဒီမိုကရေစီ အင်အားစုပါတီဥက္ကဌ ဦးခင်မောင်ဆွေက “အရင်စစ် အစိုးရလက်ထက် ကတည်းက သူလာခဲ့တယ်။ အကျဉ်းထောင်တွေထဲ ၀င်ကြည့်တယ်။ တွေ့တယ်၊ ဆုံတယ်၊ ပြန်သွားတာတွေ စတာတွေ လုပ်ခဲ့တယ်။ ဒါပေမယ့် သူလုပ်ကိုင်တာတွေနဲ့ ပတ်သက်လို့ စစ်အစိုးရက အရေးတယူ လုပ်ခဲ့တာ မရှိဘူး။ ကင်တားနားကြောင့်လည်း ကျွန်တော်တို့ ထောင်ထဲက လွတ်ခဲ့တာ မဟုတ်ပါဘူး။ ခုအချိန်ကျတော့ လူ့အဖွဲ့အစည်းဟာ ပွင့်လင်းလာပြီဆိုတဲ့ အချိန်မှာ ကင်တားနားအနေနဲ့တော့ မြန်မာနိုင်ငံ နောက်ဆုံးခရီးစဉ်မှာ ဘုန်းတော်ကြီးတွေကို မရိုမသေလုပ်တယ်။ ဘက်လိုက်မှုတွေ ရှိတယ်ဆိုပြီးတော့ သူ့ကိုပြောဆိုကြတာတွေရှိတော့ ကုလသမဂ္ဂအနေနဲ့ စဉ်းစားမယ်ထင်တယ်။ နောက်သူ့ရဲ့ သက်တမ်းကုန်တာလည်း ဖြစ်နိုင်ပါတယ်”ဟု ပြောသည်။

ကင်တားနားသည် မြန်မာနိုင်ငံ၏ နောက်ဆုံးဆယ်ရက်ကြာ ခရီးစဉ်အတွင်း သြဂုတ်လအတွင်းက မိတ္ထီလာမြို့သို့ ရောက်ရှိစဉ်ဒေသခံများက သူ၏လမ်းကြောင်းအား ပိတ်ဆို့ကာ ယင်းလိုက်ပါ စီးနင်းလာသော ကားအား ၀ိုင်း၀န်းထုနှက်ခဲ့ကြကြောင်း သြဂုတ် ၂၁ရက်တွင် ရန်ကုန်လေဆိပ်၌ ပြုလုပ်သော သတင်းစာရှင်းလင်းပွဲတွင် ပြောကြားခဲ့ပြီး ယင်းပြောကြားချက်အား ပြန်ကြားရေး ၀န်ကြီးဌာန ဒုတိယ၀န်ကြီး ဦးရဲထွဋ်က မှန်ကန်မှုမရှိကြောင်းနှင့် ပြည်သူများက ယင်းအားအေးချမ်းစွာ ဆန္ဒပြရန် ရောက်ရှိနေခြင်းသာဖြစ်ကြောင်း၊ ယင်းလိုက်ပါ စီးနင်းလာသော ကားအား ပြည်သူများက ၀ိုင်း၀န်းကန်ကျောက်သည်ဆိုသည်မှာ မဟုတ်မှန်ကြောင်း ပြန်လည်ရှင်းလင်းခဲ့သည်။