ဂျာမန် ကားထုတ်လုပ်သူ Audi က ကားတွင်တပ်ဆင်အသုံးပြုနိုင်မယ့် တက်ဘလက် ကို ထုတ်ဖော်ပြသလိုက်ပါတယ်။ Audi Smart Display လို့နာမည်ပေးထားပြီး ကားရဲ့ System နဲ့ WiFi ကို အသုံးပြုပြီးချိတ်ဆက်နိုင်မှာဖြစ်ပါတယ်။ ကားစီးနင်းသူများက ကားရဲ့ LTE Connection ကို အသုံးပြုပြီး ရေဒီယို ကို ထိန်းချုပ်နိုင်မယ့် အပြင် အင်တာနက် အသုံးပြုနိုင်မှာဖြစ်ပါတယ်။ LTE အသုံးပြုဖို့ AT&T နဲ့ ပူးပေါင်းဆောင်ရွက်မှာဖြစ်တယ်လို့ Audi ကကြေညာလိုက်ပါတယ်။
တက်ဘလက် က ၁၀.၂ လက်မအရွယ် Display တပ်ဆင်ထားပါတယ်။ တောက်ပြောင်တဲ့ အလူမီနီယမ် နဲ့ ကာရံထားပါတယ်။ တုန်ခါမှုကိုခံနိုင်ရည်ရှိအောင်ပြုလုပ်ထားပြီး အလွန်အေးတဲ့ အခြေအနေမှာတောင် အသုံးပြုနိုင်ပါတယ်။ အလွန်ပူတဲ့ အခြေအနေကိုလည်း ခံနိုင်ရည်ရှိပြီး 80 Degree Celsius (176 Degree Fahrenheit) အထိ ခံနိုင်ရည်ရှိပါတယ်။ တက်ဘလက်မှာ Nvidia Tegra T40 Processor တပ်ဆင်ထားတဲ့အတွက် စွမ်းဆောင်ရည်ကောင်းမွန်ပါတယ်။ Google Play အသုံးပြုနိုင်ပြီး Android Apps များစွာအသုံးပြုနိုင်ပါတယ်။
တက်ဘလက်ကို ဘယ်အချိန်မှာရောင်းချမလဲဆိုတာ ကိုတော့မသိရသေးသလို Android OS Version ကို အသုံးပြုထားလဲ ဆိုတာကိုလည်း Audi က ပြောကြားခြင်းမရှိပါ။ Audi က အဆိုပါကြေညာချက်ကို Las Vegas မှာ ကျင်းပပြုလုပ်နေတဲ့ Consumer Electronics Show မှာ ပြုလုပ်ခဲ့တာဖြစ်ပါတယ်။