ရန်ကုန်မြို့မှ လူရွင်တော်များနှင့် မန္တလေးမြို့မှ လူရွှင်တော်များ၏ ပထမအကြိမ် ချစ်ကြည်ရေး ဘောလုံးပွဲကို အောက်တိုဘာ ၂၂ရက်တွင် ရန်ကုန်မြို့၌ ကျင်းပမည် ဖြစ်ကြောင်း သိရသည်။
“အထက်မြန်မာပြည် မန္တလေး လူရွှင်တော်များ အသင်းကို အောက်တိုဘာ ၅ရက်မှာ ဖွဲ့တယ်။ ရန်ကုန်မှာက အရင်ကတည်းက ဖွဲ့ပြီးသား ရှိတယ်။ ရန်ကုန်- မန္တလေး လူရွှင်တော်များ ချစ်ကြည်ရေး ဘောလုံးပြိုင်ပွဲ ဖြစ်ဖို့ ရန်ကုန် လူငယ်များ အဖွဲ့က ကမ်းလှမ်းတာ ကြာပြီ။ အခုမှပဲ အကောင်အထည် ဖေါ်နိုင်တော့မှာ”ဟု ဝါရင့် လူရွှင်တော်ကြီး ဦးထင်ပေါ်က ပြောသည်။
ရန်ကုန်မြို့တွင် သဘင်၊ ရုပ်ရှင် ၊ ဆိုင်း စသော အဖွဲ့များမှ လူရွှင်တော်များရှိပြီး မန္တလေးမြို့တွင် ဇတ်၊ အငြိမ့်၊ ဆိုင်းအဖွဲ့များမှ လူရွှင်တော်များဖြင့် ဖွဲ့စည်းထားသည်။ ပထမအကြိမ် လူရွှင်တော်များ ချစ်ကြည်ရေး ဘောလုံးပွဲအတွက် မန္တလေးမြို့မှ လူရွှင်တော်များ မန္တလေး- ရန်ကုန် အသွားအပြန် ခရီးစရိတ်၊ ရန်ကုန်တွင် တည်းခို စားသောက်စရိတ်များ အတွက် ရန်ကုန် လူရွှင်တော်များ အသင်းမှ တာဝန်ယူမည် ဖြစ်ကြောင်း သိရပါသည်။