ဂျပန်နိုင်ငံ တိုကျိုမြို့တွင် ပြုလုပ်မည့် အာဆီယံ-ဂျပန် ဂီတပွဲတော်သို့ မြန်မာကိုယ်စားပြု အနုပညာရှင်အဖြစ် အဆိုတော် စိုင်းစိုင်းခမ်းလှိုင် တက်ရောက်ရန် စီစဉ်ထားသည်ဟု သိရှိရသည်။
အဆိုပါ အာဆီယံ-ဂျပန် ဂီတပွဲတော်ကို ဂျပန်နှင့် အာဆီယံနိုင်ငံများကြား ဆက်ဆံမှုနှစ် ၄၀ ပြည့် အထိမ်းအမှတ်အဖြစ် ပြုလုပ်ခြင်းဖြစ်ပြီး ဒီဇင်ဘာလအတွင်း ဂျပန်နိုင်ငံ၊ တိုကျိုမြို့တွင် ပြုလုပ်မည့် ဂျပန်-အာဆီယံ Special Summit ကို အကြိုဂုဏ်ပြုသောအားဖြင့် ပြုလုပ်ခြင်းဖြစ်သည်ဟု ဆိုသည်။
အာဆီယံ-ဂျပန် ဂီတပွဲတော်သို့ အာဆီယံနိုင်ငံအသီးသီးရှိ ထိပ်တန်းအနုပညာရှင်များအား တက်ရောက်ဖျော်ဖြေရန် ဖိတ်ကြားထားပြီး နို၀င်ဘာ၂၈ရက်တွင် NHK Hall ၌ ပြုလုပ်မည်ဟု သိရသည်။
အဆိုတော်စိုင်းစိုင်းခမ်းလှိုင်က “အာဆီယံ-ဂျပန် ဂီတဖျော်ဖြေပွဲကို ဖိတ်ကြားလာတဲ့အတွက် ကျွန်တော်သွားရောက် ဖျော်ဖြေဖို့ရှိပါတယ်။ နိုင်ငံကိုယ်စားပြုသွားရမှာ ဖြစ်တဲ့အတွက် အကောင်းဆုံး ကြိုးစားမှာပါ။ ပထမဆုံးသွားရတာ ဖြစ်တဲ့အတွက် နည်းနည်းတော့ စိတ်လှုပ်ရှားနေမိပါတယ်။ ကြိုးစားပြီးဖျော်ဖြေမယ်လို့တော့ စီစဉ်ထားပါတယ်။ နို၀င်ဘာ ၂၆ရက်မှာ သွားဖို့စီစဉ်ထားပါတယ်”ဟု ရှင်းပြသည်။
အာဆီယံ-ဂျပန် ဂီတဖျော်ဖြေပွဲတွင် အာဆီယံနိုင်ငံအသီးသီးနှင့် ဂျပန်နိုင်ငံတို့မှ ဂီတပညာရှင်များ ပါ၀င်ဖျော်ဖြေမည်ဖြစ်ပြီး ပါ၀င်မည့်သူများမှာ ဂျပန်မှ AKB 48၊ EXILE ၊ w-inds ၊ ဘရူနိုင်းနိုင်ငံမှ Mr.Zul Faden ၊ ကမ္ဘောဒီးယားမှ Mr.Preap Sovath ၊ အင်ဒိုနီးရှားမှ Ms. Agnes Monica ၊ လာအိုမှ Ms. Annita၊ မလေးရှားမှ Ms. Siti Nurhaliza၊ မြန်မာနိုင်ငံမှ စိုင်းစိုင်းခမ်းလှိုင်၊ ဖိလစ်ပိုင်မှ Mr. Christian Bautista ၊ စင်ကာပူနိုင်ငံမှ Ms. Oliva Ong ၊ ထိုင်းနိုင်ငံမှ Mr. Bird Thongchia Mcintyre ၊ ဗီယက်နမ်မှ Ms.My Linh တို့ဖြစ်ကြောင်း သိရသည်။
သြားပါျပီ ….