အအိပ်ကြီးသူများအတွက် နှိုးစက် ရိုဘော့

ဇွန်လ ၃၀ရက် ဒေးလီးမေးလ်သတင်းတွင် စက်ရုပ်တစ်ရုပ်ကဲ့သို့ ရွေ့လျားနိုင်သော နှိုးစက်နာရီကို တီထွင်လိုက်ကြောင်း သိရပါသည်။ ယင်းနှိုးစက်နာရီသည် ဘီးနှစ်ဘီးဖြင့် အခန်းတွင်းတွင် လှည့်လည်ကာ ခလုတ် မပိတ်မချင်း အသံကျယ်ဖြင့် အော်မြည်နေမည် ဖြစ်ပြီး၊ အိပ်ပုပ်ကြီးသူများအတွက် မနှိုးမချင်း နှိုးပေးမည် ဖြစ်သည်။

ယင်းနှိုးစက်သည် နှိုးရန် အချိန်ကျသည်နှင့် တစ်ပြိုင်နက် ၎င်း၏ ဘီးများက ရှေ့သို့ လည်ပတ်ရွေ့လျားလာပြီး သုံးပေမြင့်ရှိ စားပွဲပေါ်မှ အောက်သို့ ခုန်ချနိုင်သည်ဟု သိရသည်။ ယင်းနှိုးစက်အား တီထွင်သူများက Clockyဟု အမည်ပေးထားပြီး ၎င်းကို လိုက်လံ ကောက်ယူကာ ခလုတ်မပိတ်မချင်း အခန်းတွင်း လှည့်လည်ကာ မရပ်မနား အော်မြည်နေမည် ဖြစ်သည်။ စောစောထ စာကျက်ချင်သော ကျောင်းသားများ နံနက်စောစော အလုပ်သွားရမည့် ဝန်ထမ်းများအတွက် ကူညီပေးနိုင်မည် ဖြစ်သည်။

“ကျွန်တော်တို့ရဲ့ Clockyက လွယ်လွယ်ကူကူ ဖြတ်လို့ရတဲ့ အိပ်ရာတွေထဲမှာ လမ်းရှာပြီး သွားနေမှာပါ။ နှိုးစက်မြည်လာပြီဆိုတာနဲ့ သူ့ကို ခြေရာခံတွေ့အောင် ရှာဖို့ လိုပါလိမ့်မယ်။ ပြီးတော့ ခလုတ်ပိတ်ပေးနိုင်ဖို့ ကြိုးစားရပါမယ်။ အဲဒီလိုနဲ့ အအိပ်မက်သူတွေအတွက် သင့်တော်တဲ့ နှိုးစက်ပဲ ဖြစ်ပါတယ်”ဟု အရောင်းညွှန်ကြားရေးမှုး အိုင်အန်အိုလ်ဆန်က ဆိုထားသည်။ နှိုးစက်နှင့် ပတ်သက်၍ တလောကပင် နှိုးစက်နာရီ ပျံဟူ၍ တီထွင်ခဲ့ကြောင်း တွေ့ရပါသည်။