အောက်တိုဘာ ၂၈ရက်မှ ၃၁ရက်အထိ ဂျာမနီမှ ဆရာဝန်ကြီးများနှင့် မြန်မာနိုင်ငံမှ ဆရာဝန်ကြီးများ ပူးပေါင်း၍ ရန်ကုန် နား၊ နှာခေါင်း၊ လည်ချောင်း အထူးကု ဆေးရုံကြီးတွင် အတွင်းနားအတုစက်များ တပ်ဆင်ခြင်းများကို ပြုလုပ်ပေးသွားမည် ဖြစ်ကြောင်း သိရသည်။
“ဂျာမနီက ဆရာဝန်ကြီးနဲ့ မြန်မာနိုင်ငံက နား၊ နှာခေါင်း၊ လည်ချောင်း အထူးကု ဆရာဝန်ကြီးတွေ ပူးပေါင်းပြီးတော့ ခွဲပေးမှာပါ။ ခွဲစိတ်တာကတော့ မေတ္တာနဲ့ အခမဲ့ ခွဲစိတ်ပေးမှာပါ။ အတွင်းနားအတုစက်ရဲ့ တန်ဖိုးကိုတော့ လူနာတွေဘက်က ကျခံရမှာပါ”ဟု နား၊ နှာခေါင်း၊ လည်ချောင်း၊ အထူးကုဆရာဝန်ကြီး ဒေါက်တာ ဝင်းထိုက်ကြည်က ပြောသည်။
ရန်ကုန် နား၊ နှာခေါင်း၊ လည်ချောင်း၊ အထူးကု ဆေးရုံကြီးတွင် နားနှစ်ဖက်စလုံးလေးသွားပြီး မည်သည့် အသံမှ မကြားတော့သည့် လူနာများနှင့် မွေးရာပါ နားမကြားသူများအား နားအတုစက်ထည့်၍ နားပြန်လည်ကြားစေရန် ပြုလုပ်ပေးနိုင်ကြောင်း သိရသည်။
“နားလေးရောဂါကို လွန်ခဲ့တဲ့ ဆယ်နှစ်ကျော်လောက်ကအထိတော့ ကျွန်တော်တို့ အနေနဲ့ လူနာတွေကု နားကတော့ နှစ်ဖက်လုံးလေးသွားပြီး ကုသလို့ မရတော့ဘူးပေါ့။ လက်ဟန်ခြေဟန်နဲ့ပဲ စကားပြောလို့ ရမယ်ပေါ့။ ဒီလိုပဲ ပြောတတ်ပါတယ်။ အခုနောက်ပိုင်းမှာတော့ နည်းပညာတွေကလည်း တိုးတက်လာပြီ ဖြစ်တဲ့အတွက် အတွင်းနားအတုစက်နဲ့ ကုသပေးလို့ ရနေပါပြီ”ဟု ဆိုသည်။
ကမ္ဘာလုံး အတိုင်းအတာအနေနှင့် လူဦးရေ ခြောက်သောင်းကျော်သည် နားအတွင်းပိုင်းတွင် အတွင်းနားအတုစက် ထည့်ထားကြပြီး မြန်မာနိုင်ငံတွင် ယင်းစက်တပ်ထားသူ ၂၁ဦး ရှိပြီ ဖြစ်ကြောင်း သိရသည်။ အဆိုပါ အတွင်းနားတပ်ဆင်ခြင်းကို ပြုလုပ်လိုသူများ အနေဖြင့် အောက်တိုဘာ ၂၂ရက် နောက်ဆုံးထား၍ ရန်ကုန် နား၊ နှာခေါင်း၊ လည်ချောင်း၊ အထူးကု ဆေးရုံကြီးတွင် လာရောက် စာရင်းပေးသွင်းနိုင်ကြောင်း သိရှိရပါသည်။
