AK-47 ကိုတီထွင်သူ Mikhail Kalashnikov ဟာ အသက် ၉၄ နှစ်အရွယ်မှာ ကွယ်လွန်သွားပြီ ဖြစ်ပါတယ် ။ Mikhail Kalashnikov ဟာ ဒီဇင်ဘာလ ၂၃ ရက်နေ့ မှာ ကွယ်လွန်သွားကြောင်း ရုရှားနိုင်ငံရဲ့ ရုပ်သံသတင်း ဌာနက ကြေညာ သွားခဲ့တာဖြစ်ပါတယ် ။ Kalashnikov ဟာ နှလုံးနဲ့ ပတ်သတ်တဲ့ ရောဂါတွေကို ခံစားနေရတာ တော်တော်ကြာခဲ့ပြီဖြစ်ကြောင်း ကိုလည်း ပြောကြားသွားခဲ့ပါတယ် ။ Mikhail Kalashnikov ဟာသူရဲ့ AK-47 ရိုင်ဖယ် တီထွင်မှုကြောင့် နာမည်ကြီးကျော်ကြားခဲ့ပေမဲ့ AK-47 ဟာ ကမ္ဘာ့ အရက်စက်ဆုံးတိုက်ပွဲတွေမှာ အသုံးပြုခြင်းခံခဲ့ရတာကြောင့် Mikhail Kalashnikov ရဲ့ တီထွင်မှု့ဟာ သမိုင်းမှာ အငြင်းပွားဖွယ် ဖြစ်ခဲ့ပါတယ်။
Mikhail Kalashnikov ကို ၁၉၁၉ နို၀င်ဘာ ၁၀ ရက်နေ့မှာ မွေးဖွားခဲ့တာဖြစ်ပါတယ် ။ Mikhail Kalashnikov ဟာ ဒုတိယကမ္ဘာစစ်အတွင်းမှာ တင့်ကား Commander အဖြစ် တာ၀န်ယူခဲ့ပြီးနောက် အရှေ့ပိုင်းစစ်မျက်နှာပြင်တိုက်ပွဲမှာ ဒဏ်ရာ ရရှိခဲ့ပါတယ် ။ Mikhail Kalashnikov ဟာ ဒဏ်ရာမှ ပြန်လည်သက်သာလာပြီး နောက်ပိုင်းမှာ အသေးစား လက်နက်တီထွင်ထုတ်လုပ်မှုတွေကို စတင်ပြုလုပ်ခဲ့တာဖြစ်ပါတယ် ။ ရိုင်ဖယ်သေနတ်တွေရဲ့ သမိုင်းမှာ ဖျက်အားအပြင်းဆုံး ရိုင်ဖယ် အဖြစ်မှတ်တမ်းတင်ခံရတဲ့ Avtomat Kalashnikov Model 1947 ကိုတီထွင်ပြီးနောက်ပိုင်းမှာတော့ Mikhail Kalashnikov ဟာ နာမည်ကျော်ကြားလာခဲ့ခြင်းဖြစ်ပါတယ် ။ ၁၉၄၉ ခုနှစ်မှာတော့ AK-47 ရဲ့ အကြမ်းခံနိုင်ခြင်း၊ အသုံးပြုရလွယ်ကူခြင်း ၊ တိကျမှုရှိခြင်းတို့ကြောင့် ဆိုဗီယက်တပ်မတော် မှာ စတင်သုံးစွဲခဲ့ပါတယ်။
AK-47 ကိုတီထွင် ထုတ်လုပ်မှုဟာ အမိနိုင်ငံတော်ကို ကာကွယ်ဖို့အတွက်ဖြစ်ကြောင်း နဲ့ ဒီလိုတီထွင်နိုင်မှုအတွက်လည်း သူ့အနေနဲ့ ဂုဏ်ယူကြောင်း ၊ ဒါပေမဲ့ AK-47 ကို အကြမ်းဖက်သမားတွေဟာ အကြမ်းဖက်မှု့တွေအတွက် အသုံးပြုခဲ့ခြင်းကြောင့် သူ့အနေနဲ့ ၀မ်းနည်းရကြောင်း Mikhail Kalashnikov က ပြောကြားထားခဲ့ ပါတယ် ။