ပြီးခဲ့တဲ့စနေနေ့က သမီးက Running Man အခွေဝယ်ချင်တယ်ဆိုလို့ သားအဖတွေ မြို့ထဲထွက်ခဲ့ကြတယ်။ သမီးအရင်ဝယ်နေကျ လမ်းထိပ်ကအခွေဆိုင်မှာ အဲဒီအခွေက မရှိဘူး။ Running Man ဆိုတာက 5 Network က ထုတ်လွှင့်ပေးတဲ့ 5 Series ကလာတဲ့ ယှဉ်ပြိုင်ဆော့ကစား ကြယ်ပွင့်များဆိုတဲ့ ကိုရီးယားသရုပ်ဆောင်တွေ Running Ball ရအောင် ကစားကြတဲ့ ကစားပွဲတွေကိုပြတာ။ TV မှာပြတာက အပိုင်းနှစ်ဆယ်လောက်ပဲ ရှိသေးတယ်။ အခုအပြင်မှာ အခွေထွက်နေတာက အပိုင်း(၁၆၀)ကျော်ပြီ သူကလည်း ကြည့်တဲ့သူများတယ်ထင်တယ်။ အရင်တစ်ခါဝယ်တုန်းက ဆိုင်မှာမရဘူး။ မဟာဗန္ဓုလလမ်းဘက် ၃၆ ၊ ၃၇ လမ်းကြားက ကားမှတ်တိုင်နားက ပေါ်တီကို အောက်မှာရောင်းတာ။ ဒါနဲ့သားအဖတွေ ရှေ့ဆက်လျှောက်လာကြပြီး လမ်း(၄၀)ထိပ်နားမှာ ရောင်းနေတဲ့ အခွေဆိုင်တွေထဲက တစ်ဆိုင်ကိုမေးကြည့်တော့ ကုန်သွားတယ်တဲ့။ နောက်တော့ ရှေ့နားက ဆိုင်တစ်ဆိုင်မှာ ရလိုက်တယ်။ သမီးလည်း သူလိုချင်တဲ့ အခွေရသွားတော့ ဝမ်းသာသွားတယ်ပေါ့။
အဲဒီယှဉ်ပြိုင်ဆော့ကစား ကြယ်ပွင့်များ အစီအစဉ်က တနင်္ဂနွေနေ့ညပိုင်း (၈:၄၅) မှာလာတာ။ မနက်ပိုင်းမှာက အရင်တစ်ပတ်က အပိုင်းကို ပြန်ပြတယ်။ ကိုဘအေးကတော့ တစ်ခုတ်တရ မကြည့်ဖြစ်ပါဘူး။ စာဖတ်နေရင်းကနေ တစ်ချက်တစ်ချက် လှမ်းကြည့် လိုက်မိတာပဲရှိတယ်။ ကြိုက်တဲ့သူတွေကတော့ တီဗွီကလာတာ အားမရလို့ အခွေကလည်း ထွက်နေတော့ အခွေဝယ်ကြည့် ကြတာဖြစ်မှာပေါ့။ ဇာတ်လမ်းတွဲတွေလည်း ဒီလိုပါပဲ။ ရုပ်သံလိုင်းတွေကတဆင့် ထုတ်လွှင့်ပြသတာတွေကို ကြည့်ရတာအားမရလို့ အခွေအဖြစ် ကြိုတင်ထွက်ရှိလာတာတွေကိုလည်း ဝယ်ယူကြည့်ရှုကြသေးတယ်။ အခွေဆိုင်တွေမှာလည်း နိုင်ငံခြားအခွေတွေမှ အများကြီးပဲ။ အခုပြောနေတဲ့ ကိုရီးယား ဇာတ်လမ်းတွဲတွေ ၊ K Pop ခေါ်တဲ့ ကိုရီးယားသီချင်းခွေတွေ တရုတ်ကား၊ အင်္ဂလိပ်ကား၊ ကုလားကား လတ်တလော ရုပ်ရှင်ရုံတွေမှာပြနေတဲ့ နာမည်ကျော် ရုပ်ရှင်ဇာတ်ကားကြီးတွေ။ အဲဒီဇာတ်ကားကြီးတွေဆိုတာမှာ နိုင်ငံတကာမှာပြနေတဲ့ ဇာတ်ကားသစ်ကြီးတွေ ဒီမှာပါ တစ်ပြိုင်တည်းကြည့်ရတာ။ အခွေတွေလည်း ထွက်တော့ ရုံမှာမကြည့်ချင်ရင် အခွေဝယ်ပြီး အိမ်မှာကြည့်လို့ရတယ်။ ဒါပေမယ့် အိမ်မှာကြည့်ရတာနဲ့၊ ရုပ်ရှင်ရုံ မှာကြည့်ရတာက အရသာမတူပြန်ဘူး။ ရုပ်ရှင်ရုံမှာ ကြည့်ရတာက ပိုကောင်းတယ်။ အခုရုံတွေက အဆင့်မြင့်ရုံတွေဆိုတော့ အသံစနစ်ကကောင်းတယ်။ ပတ်လည်အသံစနစ်ဆိုတော့ ကိုယ့်ပတ်ဝန်းကျင်မှာ ဖြစ်ပျက်နေသလိုပဲ ခံစားရတယ်။ 3D ကြည့်ရရင်တော့ ပိုကောင်းတာပေါ့။ ဒါပေမယ့် ရုပ်ရှင်ရုံမှာ ကြည့်ရဖို့က အချိန်ပေးရတယ်။ ရုပ်ရှင်လက်မှတ်တွေကလည်း ဈေးကြီးတယ်။ မုန့်ဖိုးကလည်း ကုန်အုံးမယ်။ ကားခကလည်းရှိသေးတယ်။ အဲဒီတော့ တော်ရုံတန်ရုံက အခွေပဲဝယ်ကြည့်ကြတယ်။ အခွေဆိုင်တွေလည်း ရောင်းရတယ်ပေါ့။
ဗွီစီဒီအခွေတွေ မပေါ်ခင်တုန်းကတော့ ဗီဒီယိုတိပ်ခွေတွေကို ဗီဒီယိုအောက်စက်နဲ့ ကြည့်ရတာ။ အဲဒီတုန်းကတော့ ဗီဒီယိုအခွေ ငှားဆိုင်တွေ ဗီဒီယိုရုံတွေ အလုပ်ဖြစ်လိုက်သေးတယ်ပေါ့။ မြန်မာ့ရုပ်မြင်သံကြားကနေ နိုင်ငံခြားရုပ်သံဇာတ်လမ်းတွဲတွေ ထုတ်လွှင့်တော့ တရုတ်သိုင်းဇာတ်လမ်းတွဲတွေ စပြတာ။ တရုတ်သိုင်းကားတွေကလည်း တရုတ်သိုင်းဝတ္ထုတွေလိုပဲ စွဲတယ်။ တရုတ်သိုင်းဝတ္ထုတွေ အတွဲများသလို သိုင်းဇာတ်လမ်းတွဲတွေကလည်း အပိုင်းများတယ်။ တရုတ်သိုင်းဝတ္ထုတွေကလည်း တစ်ခေတ်ပဲ။ ဒီဝတ္ထုတွေကို လူတွေက ခုံခုံမင်မင် စွဲစွဲလမ်းလမ်းကို ဖတ်ကြတာ။ ကိုဘအေးတို့ နိုင်ငံတော် ကောင်စီရုံးကနေ ဝန်ကြီးများရုံးကို ပြောင်းရတော့ အထွေထွေဦးစီးဌာနက (ကိုဘအေးတို့ပြန်ရောက်တော့ ၁၉၇၆ ခုနှစ် ရှေ့ပိုင်းကအတိုင်း အထွေထွေအုပ်ချုပ်ရေး ဦးစီးဌာနလို့ ပြန်ဖြစ်သွားပါတယ်။) လက်ထောက်ညွှန်ကြားရေမှူး ဆရာဦးမောင်မောင်သန်းဆီကနေ အဲဒီသိုင်း ဝတ္ထုတွေ ငှားပြီး လက်ဆင့်ကမ်းဖတ်ကြရတာ။ ဆရာက စာပေစီစစ်ရေးမှာ ဦးစီးအရာရှိလုပ်ခဲ့တော့ စာအုပ်တွေပေါ တာပေါ့။ အဲဒီတုန်းက ဆရာက သာကေတ၊ ထူပါရုံလမ်းထိပ်မှာ ကျားကြီးပုံနှိပ်တိုက်ဆိုပြီး ပုံနှိပ်တိုက် ထောင်ထားသေးတယ်။ ဆရာလည်း အခုတော့ ကွယ်လွန်သွားပါပြီ။
တရုတ်သိုင်းဝတ္ထုတွေကို လူတွေစွဲလမ်းကြသလို မြန်မာ့ရုပ်သံကပြတဲ့ တရုတ်သိုင်းကား ဇာတ်လမ်းတွေကိုလည်း ခုံခုံမင်မင် ကြည့်ကြတယ်။ တရားသူကြီး မျက်နှာမဲ ပေါင်ချိန်ဇာတ်လမ်းဆိုလျှင် တော်တော်ကြိုက်ကြတာ။ အမှုလိုက်အရာရှိကျန်ကျောင်း ဆိုလျှင်လည်း တော်တော်နာမည်ကြီးသွားတာပေါ့။ ဘုရားပွဲတွေမှာတောင် ကလေး ကစားစရာအဖြစ် ဗန္ဓုလဦးထုပ်နှင့် ဓားနေရာမှာ ကျန်ကျောင်းဦးထုပ်နဲ့ ဓားက နေရာဝင်ယူလိုက်တာလေ။ တရားမျှတမှုကို ဖော်ပြတဲ့ ပေါင်ချိန်ဇာတ်လမ်းတွဲတွေဟာ မြန်မာ့ရုပ်သံကြည့် ပရိတ်သတ်တွေကို ဆွဲဆောင်နိုင်ခဲ့ပါသည်။ အဲဒီနောက်မှာတော့ ဂျပန်ရုပ်သံဇာတ်လမ်းတွဲဖြစ်တဲ့ အိုးရှင်းကို ပြသရာမှာလည်း မြန်မာပရိတ်သတ်တွေ အကြိုက်တွေ့ စွဲလမ်းခဲ့ကြတယ်။
ကိုရီးယားရုပ်သံဇာတ်လမ်းတွဲတွေ စပြတာကတော့ ၂၀ဝ၀ ပြည့်နှစ်ဝန်းကျင်လောက်လို့ ထင်ပါတယ်။ ဂျွန်စော၊ အွန်စောလို့ လူအများ ပါးစပ်ဖျားမှာ စွဲလမ်းခဲ့တဲ့ ဆောင်းဦးရွက်ကြွေချစ်သက်သေ ကိုရီးယား ရုပ်သံဇာတ်လမ်းတွဲက အစပြုလို့ နူးညံ့တဲ့ချစ်ခြင်းမေတ္တာ၊ ကြိုတင်ခန့်မှန်းလို့မရတဲ့ ဇာတ်အိမ်အလှည့်အပြောင်း အသေးစိတ်ပြသနိုင်တဲ့ ရိုက်ကူးတင်ပြချက်။ အများစုက ချောမောလှပကြတဲ့ ကိုရီးယားသရုပ်ဆောင်တွေ၊ ခမ်းနားကြီးကျယ်တဲ့ ရိုက်ကွင်း၊ ရိုက်ကွက်တွေကြောင့် ပရိတ်သတ်တွေရဲ့ ရင်ထဲကို ခိုင်မာစွာ ဝင်ရောက်ခဲ့ ကြပါတယ်။ ကိုရီးယားဇာတ်လမ်းတွဲပေါင်းများစွာကို ရုပ်သံလိုင်းတွေက ထုတ်လွှင့်ပြသခဲ့သလို ထုတ်လွှင့်ချိန်တိုင်းမှာလည်း ပရိတ်သတ်အများစုက စောင့်ကြည့်အားပေးခဲ့ကြရပါတယ်။
ယေဘူယျအားဖြင့် မိသားစုတစ်စုရဲ့ အပန်းဖြေချိန်ဟာ ညနေခင်းအချိန်တွေဖြစ်ပါတယ်။ အလုပ်သွားတဲ့သူတွေ ပြန်ရောက်တဲ့ အချိန်။ အိမ်ရှင်မတွေကလည်း အိမ်အလုပ်တာဝန်တွေ အားလပ်တဲ့အချိန် ကျောင်းသူ၊ ကျောင်းသားတွေကလည်း ကျောင်းတို့၊ ကျူရှင်တို့က ပြန်လာတဲ့အချိန် ဆုံရာဖြစ်တဲ့ ညနေခင်း အချိန်တွေဟာ မိသားစုရဲ့ အပန်းဖြေချိန်တွေလို့ ဆိုရမှာပါ။ အဲဒီလို မိသားစု အပန်းဖြေရာနည်းတွေထဲမှာ အများစု ကျင့်သုံး နေဆဲနည်းတွေကတော့ TV ကြည့်ရှု အပန်းဖြေတာဖြစ်ပါတယ်။ မိသားစု အပန်းဖြေရာ အချိန်တွေကို စိုးမိုး သိမ်းပိုက်ထားတာကတော့ နိုင်ငံခြားရုပ်သံဇာတ်လမ်းတွဲတွေပဲ ဖြစ်ပါတယ်။ ကြည့်လက်စ ရုပ်သံဇာတ်လမ်းတွဲ အမီ ရောက်ရာနေရာက ပြန်လာတတ်ကြသလို လက်ရှိလုပ်လက်စ အလုပ်တွေကို ပစ်ချပြီးတော့လည်း TV ရှေ့မှာ ပါဝင်စီးမျောရစမြဲပါ။ မိသားစုရဲ့ အရေးကြီးကိစ္စရှိနေရင်ပဲဖြစ်စေ ၊ ထမင်းလက်ဆုံ စားဖို့တောင်မှ ရုပ်သံဇာတ်လမ်းတွဲ ပြီးတဲ့အချိန်မှသာ ဆောင်ရွက်တတ်ကြတာကလည်း အလေ့အထတစ်ခုလို ဖြစ်နေပါပြီ။ မြန်မာပရိတ်သတ်တွေရဲ့ အနားယူချိန် တွေကို အပြည့်အဝ ရယူထားနိုင်တာကတော့ ကိုရီးယား ရုပ်သံဇာတ်လမ်း တွဲတွေဖြစ်ပါတယ်။
ကိုရီးယားနန်းတွင်းသမိုင်း ဇာတ်လမ်းတွဲတွေထဲက ဇာတ်ကောင်တွေဖြစ်တဲ့ ချန်ဂင်တို့ ဂျူမှုံတို့ခေတ် ဇာတ်လမ်းတွဲဖြစ်တဲ့ F4 မင်းသား ဂူဂျွန်ဖြိုးတို့တွေဟာ မြန်မာပရိတ်သတ် ပါးစပ်ဖျားက မချရလောက်အောင် စွဲလမ်းခဲ့ကြပါတယ်။ ဇာတ်လမ်းတွဲ မဟုတ်ပေမယ့် 5 Plus ကပြသတဲ့ Star King က အစီအစဉ် တင်ဆက်သူ ဟိုဒုန်းကိုလည်း မနောခွေ့ကြတာပါပဲ။ ကိုရီးယားတခွင် လှည့်လည်စားသောက်ပြနေတဲ့ လည်ကာ ပတ်ကာ မြည်းစမ်းကြမယ် အစီအစဉ်ကလည်း ကိုရီးယား အစားအစာတွေကို မြန်မာတွေ ကြိုက်နှစ်သက်လာအောင် ဆွဲဆောင်နေပါတယ်။ ကိုရီးယားရုပ်သံစီးရီးတွေရဲ့ အောင်မြင်မှု အရှိန်အဟုန်တွေဟာ အခုဆိုလျှင် ဆယ်စုနှစ် တစ်ခုကျော်ကာလကို ရောက်ရှိလို့ လာခဲ့ပါပြီ။ ဒါတင်မကပဲ အခုဆိုလျှင် ကိုရီးယားစားသောက်ကုန်တွေ၊ ကိုရီးယား အလှကုန်တွေ၊ ကိုရီးယားအဝတ်အထည်တွေ၊ ကိုရီးယား အီလက်ထရောနစ် ပစ္စည်းတွေကလည်း မြန်မာစားသုံးသူတွေ လက်ထဲကို တွင်တွင်ကျယ်ကျယ် ရောက်ရှိလို့နေပါပြီ။ ကိုရီးယား ဘာသာစကား လေ့လာ သင်ကြားမှုဆိုလျှင်လည်း ဆယ်စုနှစ်တစ်ခုအတွင်းမှာ သိသိသာသာမြင့်တက်လာခဲ့တယ်လို့ သိရပါတယ်။ ဒါက ကိုရီးယားဇာတ်လမ်းတွဲတွေရဲ့ လွှမ်းမိုးမှု အရှိန်အဟုန် ဘယ်လောက်ပြင်းထန်သလဲဆိုတာ သိနိုင်ပါတယ်။
ကိုဘအေးရဲ့ သမီးက ကိုရီးယား Crazy တစ်ယောက်ပါ။ ကိုရီးယား ရုပ်သံအစီအစဉ်တွေပဲ အကြည့်များ တယ်။ သမီးက ဂီတဝါသနာပါတော့ ရုပ်သံဇာတ်လမ်းတွဲတွေထက်စာရင် K Pop တွေကို ပိုကြိုက်တယ်။ အိမ်မှာဆိုရင် K Pop အခွေတွေမှ တစ်ပုံတစ်ပင်ကြီးပဲ။ အခွေဝယ်ရင်လည်း အဲဒီအခွေတွေပဲ အများဆုံးဝယ်တယ်။ အဆိုတော် ကောင်လေး၊ ကောင်မလေး တွေကလည်း ချောကြတယ်လေ။ နောက်ပြီးတော့ စောစောကပြောတဲ့ Running Man အခွေတွေပေါ့။ ဇာတ်လမ်းခွေတွေလည်း တစ်ချို့တစ်လေဝယ်တယ်။ သမီးက ကိုရီးယား အစွဲ ဘယ်လောက်ကြီးသလဲဆိုရင် ကိုရီးယားထမင်းသုတ်စားချင်တယ်ဆိုပြီး ပူဆာနေလို့ ဆရာစံလမ်းက ဒယ်ဝေါင်း ဂတ်ဆိုတဲ့ ကိုရီးယား စားသောက်ဆိုင်မှာ လိုက်ကျွေးခဲ့ရဖူးတယ်။ အရင်တုန်းက ကြီးလာရင် သံတမန် လုပ်မယ် ပြောတဲ့သူက အခုတော့ ဆယ်တန်းအောင်ရင် ကိုရီးယားမှာ ကျောင်းသွားတတ်မယ်။ အဆိုတော်လုပ်မယ် ပြောနေပြန်ပြီလေ။ ကိုဘအေးတို့ မိဘတွေကတော့ ဘာမှမပြောသေးပါဘူး။ သမီးက အခုမှ ရှစ်တန်းပဲ ရှိသေးတော့ ငယ်သေးတော့ နောက်ပိုင်းကျရင်လည်း ရည်ရွယ်ချက်တစ်မျိုးပြောင်းရင် ပြောင်းသွားမှာပေါ့နော်။ မြန်မာနိုင်ငံမှာ ရုပ်သံဇာတ်လမ်းတွဲတွေရဲ့ လွှမ်းမိုးမှုကတဆင့် ဂီတဘက်တွင်လည်း လွှမ်းမိုးမှု ရှိလာတာကို တွေ့ရပါတယ်။ K Pop မှာ ထင်ရှားတဲ့ အဆိုတော် အများစုဟာ မြန်မာလူငယ်ပရိတ်သတ်တွေ အားပေးကြည့် ရှုကြတဲ့ အဆိုတော်တွေဖြစ်လာကြပါတယ်။
ကိုရီးယားရုပ်ရှင် ဝေဖန်ရေး ဆရာတစ်ယောက်က ပြောဖူးတယ်တဲ့။ ကိုရီးယား ရုပ်သံဇာတ်လမ်းတွဲ တွေဟာ ကိုရီးယား နိုင်ငံအတွက် အပြောင်းအလဲများစွာ ဖြစ်ပေါ်စေခဲ့ပါတယ်ပေါ့။ ကမ္ဘာတစ်လွှားမှာ ကိုရီးယား ရုပ်သံဇာတ်လမ်းတွေကို လက်ခံစေခဲ့ရာကတဆင့် ကင်ချီကို ကြိုက်တတ်လာအောင် ကိုရီးယား အီလက်ထရောနစ် ပစ္စည်းတွေ သုံးစွဲမှုမြင့်တက်လာအောင် ကိုရီးယား အလှကုန်တွေ အစားထိုးသုံးစွဲလာအောင် ကိုရီးယား ဘာသာစကားတွေ လေ့လာသင်ကြားလာအောင် စွမ်းဆောင်နိုင်ခဲ့တယ်လို့ ဆိုပါတယ်။
ဘယ်နေမှာပဲဖြစ်ဖြစ် ကောင်းကျိုးနဲ့၊ ဆိုးကျိုးဆိုတာ ဒွန်တွဲပြီး ပါလာတတ်စမြဲပါ။ ဒီကနေ့ ကိုဘအေးတို့ နိုင်ငံမှာ လူငယ်အများစုဟာ ကိုရီးယား ယဉ်ကျေးမှုရဲ့ လွှမ်းမိုးမှု ခံနေကြရတာကို အားလုံးမြင်သိနေကြပြီး ဖြစ်ပါတယ်။ ဆံပင်ပုံစံကအစ ဝတ်စားဆင်ယင်မှုအလယ် သွားလာနေထိုင်ပုံတွေအဆုံး ကိုရီးယား ပုံစံတွေ ပြုလုပ်လာကြတာကို တွေ့မြင်နေကြမှာပါ။ ကိုရီးယား ဖက်ရှင်ရေစီးကြောင်းထဲမှာ လူငယ်တော်တော်များများ မျောပါနေကြပါပြီ။ အရင်ကဆိုရင် ဘယ်လိုမှစဉ်းစားလို့မရတဲ့ မိန်းကလေးတွေ ဘောင်းဘီတိုနဲ့ တောင် လမ်းထွက်ရဲ လာကြပါပြီ။ စကပ်လေးတွေဆိုလျှင်လည်း တိုသထက်တို ပြတ်သထက်ပြတ်လာကြပါပြီ။ ဒီနေရာမှာ ကိုဘအေးရဲ့ သမီးကိုတော့ ချီးကျူးရပါမယ်။ သမီးက ကိုရီးယားကို ကြိုက်ပေမယ့် အင်္ကျီလည်ပင်းဟိုက်ရင်တောင် မဝတ်ရဲသလို၊ အဲဒီလို အတိုအပြတ်တွေကိုလည်း မဝတ်ရဲပါ၊ မဝတ်တတ်ပါ။
ဒီနေ့ကမ္ဘာကြီးဟာ အချိန်နဲ့အမျှ ခေတ်မှီဖွံ့ဖြိုးတိုးတက်လာပြီး တစ်နေ့ထက်တစ်နေ့ ကျဉ်းမြောင်းလို့ လာနေပါပြီ။ ဒါကြောင့် တစ်နိုင်ငံက တစ်နိုင်ငံ ယဉ်ကျေးမှုတွေလည်း ကူးစက်မြန်လာကြပါတယ်။ ကူးစက်မြန်တာ ကို လက်ခံလို့ရပေမယ့် ကောင်းတဲ့ကူးစက်ခြင်း ဖြစ်အောင်တော့ သတိထားရပါမယ်။ ကိုရီးယား ရုပ်သံဇာတ်လမ်း တွဲတွေကောင်းတယ်။ မင်းသား၊ မင်းသမီးသရုပ်ဆောင်ချက်တွေ ပီပြင်လွန်းတယ်။ ကိုရီးယားဟာ ကမ္ဘာကို အနုပညာနဲ့ပါ ထိုးဖောက်နိုင်တယ်စတဲ့ မှတ်ချက်တွေကို လက်ခံနိုင်ပေမယ့် အခုနောက်ပိုင်း ဇာတ်လမ်းတွဲတွေ ဟာ အိမ်ထောင်ရေး ကမောက်ကမဖြစ်တာတွေ များလာတာကို တွေ့ရပါတယ်။ TV ကြည့်ကြတဲ့ မြန်မာပရိတ်သတ် အိမ်ထောင်ရှင်တွေ၊ လူငယ်လူရွယ်တွေ၊ ကလေးငယ်တွေအနေနဲ့ ကြည့်ပါများလာကြတဲ့အခါကျတော့ ဒီကိစ္စတွေ ဟာ မထူးဆန်းပါလားဆိုတဲ့ အသိမျိုးဝင်သွားကြမှာကိုတော့ အထူးပဲ စိုးရိမ်မိပါတယ်။
အဲဒီတော့ ဒီနေ့ TV ကပြသနေတာရော၊ အခွေအနေနဲ့ ထွက်တာရော ကိုရီးယားဇာတ်လမ်းတွဲတွေ အပါအဝင် နိုင်ငံခြားဇာတ်လမ်းတွေ ကြည့်တာလည်း ကြည့်ပါ။ အတုခိုးသင့်တာကိုခိုးပါ။ ကိုယ့်ယဉ်ကျေးမှု ကိုယ့်ဓလေ့ ထုံးတမ်းနဲ့ မကိုက်ညီတာတွေကိုတော့ မျိုးချစ်စိတ်လေး အရင်းခံထားပြီး အတုမခိုးကြပါနဲ့လို့ပဲ ပြောချင်ပါတယ်။
