Telenor၏ တရားမဝင် Account ငါးခုခန့် Facebookတွင် ပေါ်ထွက်နေ

Facebookပေါ်တွင် Telenor Account ငါးခုခန့် ထွက်ပေါ်နေပြီး ၎င်းတို့သည် Telenor၏ တရားဝင် Accountမဟုတ်ကြောင်းနှင့် သတင်းအချက်အလက်များ ရယူလိုပါက Telenorသို့ တရားဝင် မေးမြန်းနိုင်ကြောင်း သိရသည်။

Telenorသည် မြန်မာနိုင်ငံတွင် ဆက်သွယ်ရေး အော်ပရေတာတစ်ခုအဖြစ် လုပ်ကိုင်ခွင့် ရရှိခဲ့ပြီးနောက်ပို်င်း Telenor Myanmar အမည်ဖြင့် Facebook Accountများ ပေါ်ထွက်ကာ သတင်းအချက်အလက်များ ရေးသားဖော်ပြလျက် ရှိသည်။

ထိုကဲ့သို့ သတင်းအချက်အလက်များ ရေးသားဖော်ပြရာတွင် Telenorမှ အတည်ပြု ထုတ်ပြန်နိုင်ခြင်း မရှိသေးသော သတင်းအချက်အလက်အချို့ ပါဝင်နေသောကြောင့် ယခုကဲ့သို့ သတင်းထုတ်ပြန်ရခြင်းဖြစ်ကြောင်း၊ Telenorမှ ရှေ့ဆက်လုပ်ဆောင်သွားမည့် လုပ်ငန်းစဉ်များနှင့် ပတ်သက်သည့် သတင်းအချက်အလက်များကို ထုတ်ပြန်ရာတွင် ကန့်သတ်ချက်များ ရှိနေသဖြင့် လုပ်ငန်းနှင့် ပတ်သက်၍ ညှိနှိုင်း ဆောင်ရွက်မှုများ ပြီးဆုံးပါက Telenor၏ ရှေ့လုပ်ငန်းစဉ် အသေးစိတ်ကို မီဒီယာများမှ တစ်ဆင့် အသိပေး အကြောင်းကြားသွားမည် ဖြစ်ကြောင်း ထုတ်ပြန်ကြေညာခဲ့ခြင်း ဖြစ်သည်။

လောလောဆယ်တွင် Telenorသည် လုပ်ငန်း လိုင်စင်၏ သဘောတူညီမှုအတွက် လိုအပ်သော စည်းမျဉ်း အချက်အလက်များအား သက်ဆိုင်ရာ ဌာနများနှင့် အပြီးသတ် ညှိနှိုင်းမှုများ ပြုလုပ်လျက်ရှိကြောင်း၊ Telenorမှ တရားဝင် ထုတ်ပြန်သည့် သတင်းအချက်အလက်များ ရယူနိုင်ရန် Genevieve Chow (Burson- Marsteller For Telenor Group/Genevieve [email protected]/ ဖုန်း – ၀၉-၄၄၈-၀၂၆-၃၃၂)၊ မမိုးမြတ်သူ (Mango Media For Telenor Group/[email protected]/ ဖုန်း -၀၉-၄၂၀-၂၂၂-၀၇၅)သို့ မေးမြန်းနိုင်ကြောင်း သိရပါသည်။