3D Printer တွေဟာ လူရဲ့ ခန္တာကိုယ် အစိတ်အပိုင်းတွေဖြစ်တဲ့ လက်ချောင်း၊ လက်မောင်း၊ လက်ဖျံ ၊ မေးရိုး အပြင် ဘဲရဲ့ ခြေထောက်ကိုပါ ထုတ်လုပ်ပေးနိုင်ပြီဖြစ်ပါတယ်။ အခုတစ်ခါမှာတော့ လူရဲ့ ဦးခေါင်းခွံကို ပါ ထုတ်လုပ်ပေးနိုင်ပါပြီ။ ပလတ်စတစ် ဦးခေါင်းခွံ ကို သြစတျေးလျ အဖွဲ့အစည်း တစ်ခု က ပြုလုပ်ပေးလိုက်တာဖြစ်ပြီး နယ်သာလန် မှာ ရှိတဲ့ Urecht University ရဲ့ Medical Center မှာ လူနာရှင် အမျိုးသမီး ကို ခွဲစိတ် အစားထိုးလဲလှယ်ပေးလိုက်တာဖြစ်ပါတယ်။ ခွဲစိတ်မှုနာရီပေါင်း (၂၃) နာရီ ကြာမြင့်ခဲ့ပြီး လွန်ခဲ့တဲ့ သုံးလလောက်က ခွဲစိတ်ခဲ့တာဖြစ်ပါတယ်။ လူနာရှင် အမျိုးသမီး ဟာ အခုဆိုရင် အလုပ်ပြန်လုပ်နေပြီလို့ နယ်သာလန် သတင်းစာ က သတင်းပေးပါတယ်။
နယ်သာလန် နိုင်ငံသူအမျိုးသမီး ရဲ့ ဦးခေါင်းခွံဟာ သာမာန်ဦးခေါင်းခွံ ရဲ့ သုံးဆလောက် ကြီးမားလာတဲ့ ရှားပါးတဲ့ ရောဂါဝေဒနာ ကို ခံစားခဲ့ရတာဖြစ်ပါတယ်။ ဦးခေါင်းခွံကြီးမားလာမှု ကြောင့် ဦးနှောက် ကို ဖိမိပြီး ခေါင်းမူးနောက်တာ၊ အမြင်အာရုံ ဆုံးရှုံးတာတွေ ဖြစ်ပေါ်လာပါတယ်။
“ 3D Printing နည်းပညာဟာ ဦးခေါင်းခွံရဲ့ အရွယ်အစား အတိအကျကို ထုတ်လုပ်ပေးနိုင်ပါတယ်။ အရင်တုန်း က ဦးခေါင်းခွံ ရဲ့ အစိတ်အပိုင်းတစ်ချို့ကို လဲလှယ်ခဲ့ဖူးပေမယ့် ဦးခေါင်းခွံ တစ်ခုလုံး ကို လဲလှယ်တာ ဟာ ဒါပထမဆုံး ဖြစ်ပါတယ်။ နောက်ပြီး အမျိုးသမီးဟာ ပလတ်စတစ်ဦးခေါင်းခွံ ကို အသုံးပြုနေတဲ့ ပထမဆုံးလူတစ်ယောက်ဖြစ်တယ်ဆိုတာ ကျွန်တော် ယုံကြည်ပါတယ်။ “ လို့ ခွဲစိတ်ဆရာ၀န် အဖွဲ့ရဲ့ ခေါင်းဆောင် ဖြစ်သူ Verweij က နယ်သာလန် သတင်းစာ ကို ပြောပါတယ်။
ဦးခေါင်းခွံကို လဲလှယ်တဲ့ ဗီဒီယို ကို အောက်မှာ ကြည့်နိုင်ပါတယ်။