သီတင်းကျွတ်ပြီဆိုတာနဲ့ ဗျောက်အိုးဖောက်တယ်။ မီးပန်းလွှတ်တယ်။ ဖယောင်းတိုင်တွေ ထွန်းကြတယ်။ ( ဆီမီးထွန်းကြတယ်)။ ဒါတွေအပြင် သီတင်းကျွတ်ရင် လူကြီးတွေကို သွားကန်တော့လေ့ရှိကြပါတယ်။ အဲဒါတွေ အားလုံးကို ကျန်တဲ့ရက်တွေမှာ မလုပ်ဘဲနဲ့ ဘာကြောင့် သီတင်းကျွတ်မှ လုပ်ကြရသလဲ။လူကြီးတွေကို ဘာကြောင့် ကန်တော့ကြတာလဲဆိုတာကို ပြောပြချင်ပါတယ်ခင်ဗျ။ မြတ်စွာဘုရား သက်တော်ထင်ရှားရှိစဉ်တုန်းက ၀ါတွင်းကာလ(မိုးတွင်းတစ်တွင်းလုံး)မှာ ရဟန်း၊ သံဃာ(ဘုန်းကြီး) တွေဟာ မိမိတို့ကျောင်းမှ ဘယ်မှ မသွားဘဲနဲ့ ၀ါတွင်းတစ်တွင်း ( မိုးတွင်း သုံးလ လုံးလုံး) တရားအားထုတ်ကြတယ်။ အဲဒီလို တရားအားထုတ်ပြီးတော့ မိုးကုန်လို့ သီတင်းကျွတ်လကို ရောက်ပြီဆိုတာနဲ့ ထို ရဟန်း၊ သံဃာများဟာ သူတို့ကို တရားမှတ်ဖို့သင်ပေးခဲ့တဲ့ ဆရာရဟန်းတွေ( ဘုန်းကြီးတွေ) နဲ့ မြတ်စွာဘုရားဆီကို သွားပြီးကန်တော့ကြပါတယ်ခင်ဗျ။ အဲဒီလို ရဟန်း၊ သံဃာတော်တွေက သီတင်းကျွတ်မှာ ဘုရားကို သွားကန်တော့တယ်ဆိုတဲ့ ယဉ်ကျေးမှုဓလေ့ဟာ သိပ်ကိုမှ အားကျစရာကောင်းတဲ့ ယဉ်ကျေးမှု အစဉ်လာတစ်ခုဖြစ်တာကြောင့် ကျွန်တော်တို့ မြန်မာလူမျိုး ဗုဒ္ဓဘာသာဝင်များလည်း ဒီယဉ်ကျေးမှုကိုဆက်လက် ထိန်းသိမ်းတဲ့အနေနဲ့ ကျေးဇူးရှိသော ဆရာ၊ မိဘ၊အသက်ကြီးတဲ့သူတွေကို သီတင်းကျွတ်မှာ ကန်တော့ကြတာဖြစ်ပါတယ်။ သီတင်းကျွတ်မှာ ကန်တော့တာဟာ မုန့်ဖိုးရဖို့ မဟုတ်ပါဘူးနော်။ 
မီးပန်းလွှတ်တာ၊ ဖယောင်းတိုင်ထွန်းတာ ၊မီးပုံးချိတ်တာတွေဆိုတာကလည်း မြတ်စွာဘုရားဟာ ၀ါတွင်းတစ်တွင်းလုံး နတ်ပြည်မှာ နတ်တွေကို အဘိဓမ္မာတရားကိုဟောခဲ့ပြီး သီတင်းကျွတ်လပြည့်နေ့မှာ တရားဟောပြီးလို့ လူ့ပြည်ကို ပြန်ကြွလာခဲ့ပါတယ်။ မြတ်စွာဘုရား လူပြည်ပြန်ကြွလာတဲ့ အချိန်မှာ မြတ်စွာဘုရားကို ကြိုဆို ပူဇော်သောအားဖြင့် ဆီမီးတွေ ထွန်းညှိပြီးပူဇော်ကြတာပဲဖြစ်ပါတယ်။ ကလေးများအတွက် သီးသန့် နားလည်အောင်လွယ်လွယ်ပြောရရင်တော့ နတ်ပြည်ကနေ ပြန်လာတဲ့ မြတ်စွာဘုရားကို မီးတွေထွန်းပြီး ကြိုဆိုကြတာပေါ့ဗျာ။ ဒါဟာ သီတင်းကျွတ်မှာ မီးတွေ ထွန်းကြ ဆီမီးတွေပူဇော်ကြတဲ့ အကြောင်းအရင်းများပဲဖြစ်ပါတယ်ခင်ဗျ။
ICT.com.mm ရဲ့ Customer ကြီးများလည်း ဒီနေ့ ကျရောက်လာတဲ့ သီတင်းကျွတ်လပြည့်နေ့ အခါသမယလေးမှစ၍ စိတ်ချမ်းသာကိုယ်ကျန်းမာပြီး စီးပွားလာဘ်လာဘများ ပွင့်ကြပါစေလို့ ကျွန်တော်တို့ ICT မိသားစုမှ ဆုမွန်ကောင်း တောင်းပေးလိုက်ပါတယ်ခင်ဗျာ။
