ပျောက်ဆုံးနေတဲ့ မလေးရှားလေယာဉ် ကို နိုင်ငံအများအပြား က ကူညီရှာဖွေပေးနေပေမယ့် ရှာမတွေ့သေးပါဘူး။ အမေရိကန် အခြေစိုက် Satellite အဖွဲ့အစည်း တစ်ခုက တော့ လူအများအပြား ရှာဖွေရင် တွေ့နိုင်မယ်လို့ ယုံကြည်နေပါတယ်။ ကော်လိုရာဒို အခြေစိုက် DigitalGlobe က အခြား Satellite များ လက်လှမ်းမမီသည့် ထိုင်းပင်လယ်ကွေ့ နဲ့ တောင်တရုတ်ပင်လယ်များ ကို အဓိက ထား ရှာဖွေပေးနိုင်တဲ့ Satellite နှစ်ခု ကို လွှတ်တင်ခဲ့ပါတယ်။ မကြာမီ က ထွက်ပေါ်ခဲ့တဲ့သတင်းများအရ လေယာဉ် ဟာ မလက္ကာ ရေလက်ကြား ဘက် ရောက်ရှိတယ်လို့ သိရတဲ့အတွက် အဲဒီနေရာ မှာလည်း ရှာဖွေမှာ ဖြစ်ပါတယ်။ Satellite က ရိုက်ကူးထားတဲ့ ဓာတ်ပုံများ ကို အွန်လိုင်းပေါ်တင်ပေးမှာ ဖြစ်ပြီး အင်တာနက် အသုံးပြုသူများ က ကူညီရှာဖွေပေးနိုင်မှာဖြစ်ပါတယ်။
ဓာတ်ပုံတွေကို Tomnod ၀က်ဆိုက်မှာ တင်ပေးထားမှာဖြစ်ပါတယ်။ Tomnod ၀က်ဆိုက်ဟာ သဘာ၀ဘေးအန္တရာယ် နဲ့ အခြား အကြောင်းအရာများအတွက် လူအများ က ကူညီရှာဖွေပေးနိုင်အောင် ပြုလုပ်ထားတာဖြစ်ပါတယ်။ DigitalGlobe က တနင်္လာနေ့မှာ ပထမဆုံး ဓာတ်ပုံ ကို တင်ပေးအပြီး နှစ်ဆယ့်လေးနာရီအတွင်းမှာ လူပေါင်း ငါးသိန်း က ကူညီရှာဖွေပေးခဲ့ပါတယ်။ လူများပြားလွန်းတဲ့အတွက် ဆာဗာ တွေ ဒေါင်းခဲ့ပြီး အခုတော့ ပြန်လည် အလုပ်လုပ်နေပြီဖြစ်ပါတယ်။
DigitalGlobe က ပြီးခဲ့တဲ့နှစ် က သြစတျေးလျ ကမ်းရိုးတန်း မှာ ပျောက်ဆုံးသွားတဲ့ Nina သင်္ဘော ကို ရှာဖွေရာမှာလည်း သူတို့ရဲ့နည်းပညာ ကို အသုံးပြုခဲ့ပါတယ်။ ကွန်ဂို က The Lord’s Resistance Army ကို ခြေရာခံရာမှာလည်း အသုံးပြုခဲ့ဖူးပါတယ်။ DigitalGlobe က အဆိုပါ ၀န်ဆောင်မှုများ ကို အခမဲ့ ပြုလုပ်ပေးခဲ့တာဖြစ်ပါတယ်။
ပျောက်ဆုံးနေတဲ့ လေယာဉ် ကို ရှာဖွေဖို့ အောက်က လင့် ကနေ Tomnod ၀က်ဆိုက်ကို သွားပြီး ညာဘက်အပေါ်ထောင့် က Sign In ခလုတ် ကို နှိပ်ပြီး အီးမေး ဖြည့်ပေးရပါမယ်။ ပြီးရင် မြေပုံ ကနေ ရှာဖွေနိုင်ပြီဖြစ်ပါတယ်။ ဆီကွက်တွေ့ရင် ဘယ်ဘက် က Oil Slick ကို တစ်ချက်နှိပ်ပြီး မြေပုံပေါ်မှာ တစ်ချက်နှိပ်ရမှာဖြစ်ပါတယ်။ အပျက်အဆီးတွေ့ရင် Wreckage ကို အသုံးပြုရမှာဖြစ်ပါတယ်။