လွန်ခဲ့သော နှစ်နှစ်တာကာလအတွင်း မြန်မာနိုင်ငံတစ်ဝှမ်း တိုင်းရင်းသား လူမျိုးစုများ မှီတင်းနေထိုင်ရာ ပြည်နယ်ကြီး ၇ ခု (ကရင်ပြည်နယ်၊မွန်ပြည်နယ်၊ ကယားပြည်နယ်၊ ချင်းပြည်နယ်၊ ကချင်ပြည်နယ်၊ ရှမ်းပြည်နယ်နှင့် ရခိုင်ပြည်နယ်) တို့တွင် ဗြိတိ သျှကောင်စီမှ ဝတ္ထုတို အလုပ်ရုံ ဆွေးနွေးပွဲ (short story workshop) များမှတဆင့် တိုင်းရင်းသားစာပေဖြင့် လွတ်လပ်စွာ ဖန်တီးခွင့်နှင့် ထုတ်ဖေါ်တင်ပြခွင့်တို့ကို ပံ့ပိုးမှု ပြုလုပ်ခဲ့ပါသည်။
ယခုအခါ အဆိုပါ Hidden Words, Hidden Worlds ဟု အမည်ပေးထားသည့် ပရောဂျက်၏ရလာဒ်အဖြစ် တိုင်းရင်းသား စာပေ ၁၀ မျိုး (စကောကရင်၊ ပိုးကရင်၊ မွန်၊ ဂျိမ်းဖော၊ ရှမ်း၊ လိုင်ဟားခါး၊ ကယမ်း၊ ကယား၊ ကယော၊ ရခိုင်) မှ မြန်မာဘာသာ သို့ ပြန်ဆိုကာ မူရင်း တိုင်းရင်းသားဘာသာနှင့် ပူးတွဲ၍ ဖေါ်ပြထားသော၂ ဘာသာ ဝတ္ထုတိုပေါင်းချုပ်စာအုပ်ကို ၂၀၁၅ ခုနှစ်၊ မေလတွင် ပုံနှိပ် ထုတ်ဝေတော့မည် ဖြစ်ပါသည်။
မြန်မာနိုင်ငံ တစ်နံတစ်လျားမှ စာပေ ယဉ်ကျေးမှု၏ နက်ရှိုင်းမှုကို စင်တင်ပြသရန် ရည်ရွယ်၍ မိလေးမွန်၊ Rev.N-Gan Tang Gun ၊ စောချစ်သန်း အစရှိသည့် တိုင်းရင်းသား စာရေးဆရာ ၂၀ ကျော်၊ ပုံနှိပ်ထုတ်ဝေသူများနှင့် ချင်း၊ ကချင်၊ ကရင်၊ ကယား၊ မွန်၊ ရခိုင်နှင့် ရှမ်းပြည်နယ်တို့မှ စာပေနှင့် ယဉ်ကျေးမှုအသင်းများမှ ဥက္ကဌများ ပါဝင်သော နှစ်ရက်တာ တွေ့ဆုံနှီးနှော ဖလှယ် ပွဲကို ဗြိတိသျှကောင်စီ နှင့် PEN Myanmar တို့မှ စီစဉ်၍ ရန်ကုန်မြို့တွင် မတ်လ ၁၃ ရက်နှင့် ၁၄ ရက်များတွင် ကျင်းပမည် ဖြစ်ပါသည်။
ပထမနေ့ (သောကြာနေ့၊ ၂၀၁၅ မတ်လ ၁၃) နေ့တွင် ရန်ကုန်မြို့ရှိ ဗြိတိသျှကောင်စီရုံး၌ တိုင်းရင်းသားစာပေနှင့် ယဉ်ကျေးမှု အသင်း ၇ သင်းမှ ဥက္ကဌများနှင့် ရန်ကုန် အခြေစိုက် စာပေနယ်ပယ်မှ ကိုယ်စားလှယ်များမှ ၎င်းတို့အကြား ခိုင်မြဲသော ဆက်ဆံ ရေးကို စတင်တည်ဆောက်ရန် ဆွေးနွေးပွဲ ကျင်းပမည်ဖြစ်ပြီး ဒုတိယနေ့ (စနေနေ့၊ ၂၀၁၅ မတ်လ ၁၄) နေ့တွင် ပြည်သူ့ဥယျာဉ်ရှိ Yangon Gallery (ရန်ကုန် အနုပညာပြခန်း) တွင် အများပြည်သူများ တက်ရောက်ခွင့်ရှိမည့် အဖွဲ့ငယ်များခွဲ၍ ဆွေးနွေးပွဲ (panel discussion) များကို ပြုလုပ်မည်ဖြစ်ပြီး တိုင်းရင်းသား ကဗျာများအကြောင်း၊ တိုင်းရင်းသား စာပေဖြင့် ထုတ်ဝေသော ဂျာနယ်များအကြောင်း၊ စာသင်ကျောင်းများတွင် တိုင်းရင်းသားစာပေနှင့် ဘာသာရပ်များ ထည့်သွင်း သင်ကြားရေးစသည့် စိတ်ဝင်စားဖွယ် အကြောင်းအရာ အစုံအလင်တို့ကို ဆွေးနွေးဖလှယ်ကြမည် ဖြစ်ပါသည်။
၎င်းအပြင် ဆန်းသစ် စာပေ အရေးအသားဆိုင်ရာ (Creative Writing lecturer) ကထိက တစ်ဦးဖြစ်ပြီး Bones Will Crow (အရိုးတွန်သံ) စာအုပ်၏ ပူးတွဲစာရေးဆရာ တစ်ဦးဖြစ်သူ နာမည်ကျော် ဗြိတိသျှ ကဗျာဆရာ James Byrne နှင့် တွေ့ဆုံခြင်း ကဏ္ဍတစ်ခု ဖြစ်သည့် “James Byrne နှင့် စကားစမြည်” (In Conversation with James Byrne) အထူး အစီအစဉ်ကို ထည့်သွင်းစီစဉ်ထားပါသည်။
ဗြိတိသျှကောင်စီ၏ မြန်မာနိုင်ငံ ညွှန်ကြားရေးမှူး Kevin Mackenzie မှ ပြောကြားရာတွင် ဤ နှီးနှောဖလှယ်ပွဲမှာ တိုင်းရင်းသား စာပေ အရေးအသား ၏ ငုတ်လျှိုးနေသော ကမ္ဘာကို လှစ်ဟကြည့်ခြင်းရဲ့ အထွဋ်အထိပ်ပင် ဖြစ်ပါကြောင်း၊ တိုင်းရင်းသား လူနည်းစုများက ၎င်းတို့၏ အတွေ့အကြုံ၊ စိတ်ကူးယဉ် ဇာတ်လမ်းများမှတဆင့် ထုတ်ဖော်တင်ပြချက်များကို လေ့လာချင်စရာ အမြောက်အများရှိရာ ဤနှီးနှောဖလှယ်ပွဲမှာ ၎င်းတို့၏အသံများကို ကြားရအောင် စွမ်းဆောင်ပေးမှာဖြစ် ကြောင်း၊ မြန်မာနိုင်ငံ၏ တိုင်းရင်းသား လူမျိုးစုများကို စိတ်ဝင်စားသူတိုင်း ဤပွဲကို စိတ်ဝင်စားဖွယ် ပွဲတစ်ခုဟု ပြောရမည် ဖြစ်သည့်အပြင် စာရေးသူများမှာလည်း စာဖတ်ပရိသတ် အသစ်များကို ရရှိနိုင်မှာ ဖြစ်ကြောင်း ပြောကြားသွားပါသည်။
PEN Myanmar မှ ဆရာမ မသီတာ (စမ်းချောင်း) က မြန်မာနိုင်ငံတွင် ငြိမ်းချမ်းရေးရရှိ တည်တန့်စေရန် လူနည်းစုများ၏ စာပေများကို ပြုစုပျိုးထောင်ပေးရန် လိုကြောင်း၊ စာပေသည် လူမျိုးတစ်ခု၏ ယဉ်ကျေးမှု ဓလေ့များကို လေ့လာရာတွင် အခရာ ကျကြောင်း၊ ထို့ကြောင့် ယခု တွေ့ဆုံဆွေးနွေးပွဲသည် အရေးပါသော ဆွေးနွေးပွဲ တစ်ရပ်ဖြစ်ကြောင်း ပြောကြားပါသည်။
ပြခန်းအတွင်းရှိ ပြပွဲ သင်ပုန်းများတွင် Hidden Words, Hidden Worlds ဝတ္ထုတို အလုပ်ရုံ ဆွေးနွေးပွဲ workshop များ၏ သမိုင်းမှတ်တမ်း ဓါတ်ပုံများအပြင် ဝတ္ထုတို ဇာတ်လမ်းများမှ ကောက်နှုတ်တင်ပြချက်များ အချို့ကိုလည်း ပြသထားမည် ဖြစ်ပါသည်။ ပြခန်းငယ် ၁၅ ခန်းပါဝင်သော ပွဲကျင်းပရာနေရာ ကွင်းပြင်နေရာအတွင်း ပုံနှိပ်ထုတ်ဝေသူများ၊ စာအုပ်တိုက်များမှ စာအုပ်ဈေးရောင်းပွဲတော် တစ်ခုပါ ကျင်းပမည် ဖြစ်ပါသည်။
စိတ်ပါဝင်စားသူ စာပေဝါသနာရှင် မည်သူမဆို နံနက် ၉:၃၀ မှ ညနေ ၅:ဝ၀ နာရီ အထိ မတ်လ (၁၄) ရက် (စနေနေ့) တွင် ပြည်သူ့ဥယျာဉ်ရှိ Yangon Gallery သို့ ကြွရောက်နားဆင် အားပေးကြည့်ရှုနိုင်ပါသည်။
